Эмомалӣ Раҳмон: «Тоҷикистону Ҳиндустон оид ба масъалаҳои амният ва мубориза бар зидди зуҳуроти терроризму экстремизм дидгоҳи яксон доранд»

Душанбе, 13.07.2015. (АМИТ «Ховар»). -Президенти Ҷумҳурии Тоҷикистон Эмомалӣ Раҳмон пас аз анҷоми музокироти байнидавлатии Тоҷикистону Ҳиндустон изҳор дошт, ки Тоҷикистону Ҳиндустон оид ба масъалаҳои амнияту субот, мубориза бар зидди зуҳуроти терроризму экстремизм, кочоқи маводи мухаддир, ҷинояткории муташаккили фаромиллӣ ва зарурати тақвияти ҳамкории иқтисодии минтақавӣ дидгоҳи яксон доранд.
«Мо мувофиқ бар он будем, ки баъд аз хурўҷи неруҳои асосии эътилофи байналмилалӣ аз Афғонистон ва дар вилоятҳои шимолии он маскан гирифтану фаъол шудани гурўҳҳои мухталифи террористию экстремистӣ пайдо намудан ва ба кор гирифтани роҳҳои муассири ҳалли қазияи Афғонистон ва истиқрори ҳаёти комилан осоишта дар қаламрави он ҳамоҳангии бештари фаъолиятҳои муштараки Тоҷикистону Ҳиндустонро тақозо менамоянд. Дар ин робита зарурати фаъолгардонии гурўҳҳои кории дуҷониба оид ба мубориза бо терроризм ва ҳамкориҳои низомӣ ва Комиссияи муштараки байниҳукуматии ҳамкориҳои гуногунарса бори дигар мавриди таъкид қарор гирифт», — таъкид намуд Эмомалӣ Раҳмон.