Комиссияи барқарорсозии оқибатҳои офати табиӣ дар ноҳияи Шуғнон ба кор шуруъ намуд

Душанбе, 18.07.2015 (АМИТ “Ховар”).- Субҳи имрўз  бо супориши Президенти  Ҷумҳурии Тоҷикистон Эмомалӣ Раҳмон Комиссияи ҳукуматӣ оид ба бартараф кардани оқибатҳои офати табиӣ дар ноҳияи Шуғнони Вилояти Мухтори Куҳистони Бадахшон таъсис дода шуд.
Комиссияи барқарорсозии оқибатҳои офати табииро Сарвазири Ҷумҳурии Тоҷикистон Қоҳир Расулзода роҳбарӣ мекунад, ки имрўз дар маҳали ҳодиса ба кор шуруъ намуд. 
Ба ҳайати комиссия вазири молия, вазири тандурустӣ ва ҳифзи иҷтимоии аҳолӣ, вазири нақлиёт, вазири энергетика ва захираҳои об, раиси Кумитаи давлатии сармоягузорӣ ва идораи амволи давлатӣ, раиси Кумитаи ҳолатҳои фавқулода ва мудофиаи гражданӣ, директори Агентии захираҳои моддии давлатии назди  Ҳукумати Ҷумҳурии Тоҷикистон, директори Корхонаи воҳиди давлатии “Хоҷагии манзилию коммуналӣ”, муовини аввали вазири меҳнат, муҳоҷират ва шуғли аҳолӣ, роҳбарияти мақомоти иҷроияи маҳаллии ҳокимияти давлатии Вилояти Мухтори Куҳистони Бадахшон ва масъулини дигар вазорату идораҳо  шомиланд.
Бо дастури Президенти Ҷумҳурии Тоҷикистон Эмомалӣ Раҳмон имрўз комиссия дар маҳали ҳодиса оид ба бартараф кардани оқибатҳои офати табиӣ тадбирҳои мушаххас андешида, ба зарардидагон кумакҳои аввалия мерасонанд. Тавре аниқ гардид, бар асари омадани  сел 56 манзили зисти сокинони ҷамоати деҳоти Сучони ноҳияи Шуғнон, 4 километр роҳ ва 3 километр хатҳои барқ пурра хароб гардидаанд. Масъулини комиссия аз Сарвари давлат Эмомалӣ Раҳмон дастур гирифтанд, ки ҳарчи зудтар иншооти харобгардида ва зиндагии муқаррарии мардумро барқарор намоянд.