Кумитаи сармоягузорӣ: дар се моҳ 201,6 млн. доллар сармояи хориҷӣ ворид шуд

Душанбе, 27.07.2015. (АМИТ «Ховар», Ситораи Боймурод).- Тибқи иттилои Кумитаи давлатии сармоягузорӣ ва идораи амволи давлатии Ҷумҳурии Тоҷикистон, азхудкунии маблағҳо дар нимсолаи якуми соли 2015 899,6 млн. сомониро ташкил додааст.
Тибқи маълумоти расмӣ воридоти сармояи хориҷӣ дар семоҳаи якуми соли равон 201,6 млн. долларро ташкил додааст, ки аз он 96,6 млн. доллари ИМА сармоягузории мустақим мебошад. 
Ба иттилои манбаъ, воридоти сармояи мустақими хориҷӣ асосан ба соҳаҳои омӯзиши геологӣ ва истихроҷи канданиҳои фоиданок, алоқа, сохтмон, саноат, саноати масолеҳи сохтмонӣ, кишоварзӣ равона гардидааст.
Гуфта мешавад, ки дар давраи ҳисоботӣ кумита корро дар самти ҷалби бештари сармоягузории мустақим тақвият бахшидааст. Аз ҷумла, вобаста ба таҳияву татбиқи созишномаҳои сармоягузорӣ бо ширкати «Кока-Кола Ичечек А.С», ширкати «Хуаксин семент Ко ЛТД», ҶДММ «Ширкати кӯҳӣ- саноатии Тоҷикистону Хитой», ҶДММ «Ширкати байналмиллалии Чжунгсай моҳир семент», ширкати «Ходай групп», ҶДММ «Пакрут» корҳо идома дода шуданд.