Л. Файзуллоев: маблағи лоиҳаҳои давлатии сармоягузорӣ — 14,1 млрд. сомонӣ

Душанбе, 27.07.2015. (АМИТ «Ховар», Ситораи Боймурод).-Дар самти ташаккулу татбиқи лоиҳаҳои сармоягузории давлатӣ бояд зикр намуд, ки маҷмӯи лоиҳаҳои давлатии сармоягузории амалкунанда дар ҷумҳурӣ то 1-уми июли соли 2015  аз 54 лоиҳа иборат буда, маблағи умумии он 14,1 млрд. сомонӣ ё 2,25 млрд. доллари ИМА-ро ташкил медиҳад,- гуфт Лочин Файзуллозода, муовини аввали раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон имрӯз, 27 июл зимни нишасти матбуотӣ ба хабарнигорон.
Ба иттилои манбаъ, дар давраи ҳисоботӣ бо шарикони рушди кишвар 5  созишномаи нав бо маблағи умумии 123,5 млн. доллари ИМА ба имзо расонида шуд, ки 67 фоизи онро маблағҳои грантӣ ташкил медиҳад.
Гуфта мешавад, ки дар доираи татбиқи лоиҳаҳои амалишаванда то 1-уми июли соли равон 6,76 млрд. сомонӣ аз худ карда шудааст, ки ин 48 фоизи маблағи умумиро ташкил медиҳад.
Маҷмӯи лоиҳаҳо зиёда аз 10 соҳаи гуногуни иқтисодиётро дар бар гирифта, дар таркиби онҳо маблағҳои қарзӣ- 45 фоиз, маблағҳои грантӣ- 47 фоиз, саҳми Ҳукумати Ҷумҳурии Тоҷикистон- 6,7 фоиз ва дигар сарчашмаҳо, аз ҷумла, ҳиссаи ширкатҳои давлатӣ ва ҷамоаҳо- 1,3 фоизро ташкил медиҳад.