Мақомоти прокуратураи ҳарбӣ корҳои тарбиявиро миёни хизматчиёни ҳарбӣ вусъат медиҳад

Душанбе, 15.07.2015. (АМИТ «Ховар», Лайло Тоирӣ).- Кормандони  мақомоти прокуратураи ҳарбӣ вазифадор шудаанд, ки корҳои тарбиявию фаҳмондадиҳиро дар байни хизматчиёни ҳарбӣ вусъат бахшанд.  Ин нукта зимни ҷаласае, ки дар Сарпрокуратураи ҳарбӣ таҳти роҳбарии Прокурори генералии Ҷумҳурии Тоҷикистон генерал- лейтенанти адлия Раҳмон Юсуф Аҳмадзод баргузор гардид, ироа  шуд. Дар  ҷаласа  масъулин пеш аз ҳама бурдани корҳои фаҳмондадиҳиро барои пешгирӣ ва огоҳкунӣ аз шомилшавии шаҳрвандон ба гурӯҳу равияҳои ифротӣ ва ҳизбу ҳаракатҳои тундрав мавриди муҳокима қарор доданд.
Бино ба хабари Вазорати мудофиа, чунин як чорабинии машваратӣ дар шаҳри Қӯрғонтеппа бо иштироки масъулини Прокуратураи ҳарбӣ, сохторҳои қудратӣ ва комиссарони ҳарбии шаҳру ноҳияҳои минтақаи Хатлон низ доир гардид. Зимни баргузории он кормандони ҳифзи ҳуқуқ як зумра масъалаҳоро мавриди таҳлилу баррасӣ қарор дода, вобаста ба шомил гардидани ҷавонон ба ҳар гуна ҳаракатҳои террористиву экстремистӣ изҳори нигаронӣ намуданд.
Дар  ҳамоиш аз ҷониби иштирокдорон роҳу усулҳои баланд бардоштани донишҳои ҳарбӣ-сиёсии ҷавонон пешниҳод гардиданд.