Парлумони Юнон тадбирҳои бахши сарфакориро маъқул ёфт

Душанбе, 16.07.15. (АМИТ «Ховар»). – Парлумони  Юнон лоиҳаи қонунро  дар  бораи  тадбирҳои  сарфакорӣ, ки  барои  бастани   созишнома  бо  механизми аврупоии эътидолгардонӣ   заруранд,  маъқул  ёфт. Дар  ин  бора  Агентии Reuters  хабар  дод. 
Аз  ин  пеш   сарвазири  Юнон Алексис  Сипрас  вакилонро  даъват  намуда буд, ки  лоиҳаи  қонунро  дастгирӣ  кунанд. Назар  ба  хабари РИА «Новости»,  сарвазир  изҳор  дошт, ки  вакилон  бояд  масъулияти  воқеаҳои   дар  кишвар  рух додашударо  ба  дӯши  худ  гиранд. 
Сипрас ҳамзамон  изҳори  умедворӣ  кард, ки  сиёсати  ҳукумат  натиҷаҳои  мусбат хоҳад  дод. Ба  гуфтаи  ӯ,  ҳоло  дар  Аврупо  мубориза  на барои  Юнони кучак,  балки  барои  оянда  меравад. 
Дар  ҷараёни  баррасии  лоиҳаи  қонун бо  ибтикори  анархистон (худсарон)  дар  назди  бинои  парлумон  задухӯрдҳо  бо  кормандони  пулис рух  доданд. Беш  аз  50  нафар  барои иштирокашон  дар  ин  бетартибиҳо дастгир  шуданд.
13  июл  Юнон ва Иттиҳоди  Аврупо  дар  бораи  барномаи баромадан  аз бӯҳрони  тӯлонӣ аҳд  карданд. Афина тайи  се  сол 86  миллиард  евро гирифта,  барои  ин  дар  кишвар  бояд  тартиби  сарфакорӣ  ҷорӣ  гардад. 
Барномаи  мазкур  таҷдиди  низоми  андозу  нафақа,  ҳамчунин  хусусигардонии  моликияти давлатӣ баробари  50  миллиард  евроро дар назар  дорад. Дар  ҷараёни райъдиҳӣ 5  июл  61,31  фоизи юнониҳо зидди ин  чорабиниҳо  овоз  доданд.