ПСС: Саҳми соҳибкорон дар баланд бардоштани иқтидори иқтисодии корхонаҳо назаррас аст

Душанбе, 8.07.2015. (АМИТ «Ховар», Раъно Нусратуллозода).-«Дар айни замон саҳми  соҳибкорон, ки  қариб 700 нафари он узви  Палатаи савдо ва саноат (ПСС) мебошад, дар муттаҳид намудани корхонаҳое, ки иқтидори  иқтисодиро муайян намуда, робитаҳои тиҷоратиро васеъ мегардонанд, назаррас аст»,-зикр намуд муовини раиси Палатаи савдо ва саноати Ҷумҳурии Тоҷикистон Манзура  Рустамова имрӯз, 8 июл зимни нишасти матбуотӣ. 
Имрӯз бо пешрафти ислоҳоти демократӣ дар озодандешӣ ва такмили сохтори идоракунӣ, иқтисоди Точикистонро бе сармоягузории бузурги хориҷӣ тасаввур кардан ғайриимкон аст. Яке аз омилҳои дохил шудани сармоягузор ба бозори Тоҷикистон -ин мавҷудияти шароит барои ҳалли баҳсҳои  тиҷорати байналмилалӣ дар ҳолати пайдо шудан ва ҳалли бошууронаи он мебошад. Бо шарофати ҳалли холисона, тез ва   камхарҷи баҳсҳо арбитражи тиҷоратии байналмиллалӣ дар миёни субъектҳои гардиши молу хизматрасонӣ эътирофи зиёдеро касб менамояд.  Аз ин лиҳоз, Палатаи савдо ва саноат механизмҳои «Равзанаи ягона», Арбитражи байналмилалии тиҷоратиро дастгирӣ менамояд.