Сармураббии тими мунтахаби футболи Тоҷикистон ба истеъфо рафт

Душанбе, 16.07.2015. (АМИТ «Ховар»). — Бино ба иттилои сомонаи Федератсияи футболи Тоҷикистон, сармураббии тими мунтахаби футболи Тоҷикистон Муҳсин Муҳаммадиев аз мақоми худ истеъфо дод.
Муҳсин Муҳаммадиев ба истеъфо рафтанашро шарҳ дода, чунин гуфт: «Пас аз нокомиҳои тими мо дар оғози даври интихобии Мусобиқоти ҷаҳон — 2018, ки мо дар ду бозӣ ҳамагӣ 1 хол ба даст овардем, ман қарор додам, ки истеъфо диҳам. Сад афсӯс, ки фаъолияти якҷояи мо самаре надод ва чунин анҷом ёфт. Ман тамоми масъулиятро барои чунин натиҷа бар дӯш мегирам. Ман мехоҳам ба роҳбарияти Федератсияи футболи Тоҷикистон дар шахсияти президенти ФФТ Рустами Эмомалӣ ва ба муовини аввали президенти ФФТ Хуршед Мирзоев барои кумак ва дастгирие, ки ман дар давоми ду соли фаъолият дар мақоми сармураббии тими мунтахаб эҳсос кардам, арзи сипос намоям. Ман инчунин аз бозингарони тими миллӣ барои фаъолияти якҷоя ва аз мухлисон барои дастгирии тими мунтахаб минатдорам».