Ш. Шоҳиён: «Барои 24 нафар ҷазои маҳрум сохтан аз озодӣ татбиқ шуд»

Душанбе, 13.07.2015. (АМИТ «Ховар», Лайло Тоирӣ).-Аз 25 маҳкумшуда нисбат ба 24 нафар ҷазои маҳрум сохтан аз озодӣ татбиқ шуда, нисбат ба 1 нафар ҷазо шартан татбиқ нашудааст. Ин нуктаро имрӯз зимни нишасти матбуотӣ раиси Суди Олӣ Шермуҳаммад Шоҳиён таъкид намуд.
Ба гуфтаи раиси Суди Олӣ аз 14 парвандаи гражданӣ ва оилавӣ 7 парванда бо баровардани ҳалнома баррасӣ шуда, 2 парванда бинобар аз даъво даст кашидани даъвогарон қатъ карда шуд. 5 дархост оид ба эътироф ва иҷрои ҳалномаҳои судии давлатҳои хориҷӣ  мебошад, ки 3 ададаш қонеъ ва 2 -тои он рад карда шудааст.
Ба тариқи кассатсионӣ ва назоратӣ дар ин давра аз рӯи парвандаҳои ҷиноятӣ 111 санади судӣ нисбат ба 159 шахс мавриди санҷиш қарор дода шуд. 
«Дар натиҷа 17 -тои он нисбат ба 19 нафар бинобар нодуруст татбиқ гардидани қонуни ҷиноятӣ, ба таври ҷиддӣ вайрон карда шудани қонуни мурофиавии ҷиноятӣ, яктарафа ё нопурра будани таҳқиқ, тафтиши пешакӣ ё судӣ бекор гардид»,-афзуд Шермуҳаммад Шоҳиён.