Шабакаҳои обёрии байнихоҷагӣ ба мавсими обдиҳии соли 2015 омодаанд

Душанбе,  20.07.2015 (АМИТ «Ховар», Рафоати Абдулҳамид).- Имрӯз  дар Агентии беҳдошти замин ва обёрии назди Ҳукумати Ҷумҳурии Тоҷикистон нишасти матбуотӣ оид ба ҷамъбасти фаъолияти беҳдошти замин дар шашмоҳаи аввали соли ҷорӣ доир гардид. Муовини директори агентӣ Абдулло Қурбонов зикр намуд, ки дар  нимсолаи аввали соли 2015  ҷиҳати иҷрои вазифаҳо оид ба таъмин намудани кишоварзон ва дигар истифодабарандагон бо оби обёрӣ, аз худ намудани заминҳои нави обёришаванда, гузаронидани корҳои соҳилмустаҳкамкунӣ ва беҳтар намудани ҳолати мелиоративии заминҳо корҳои муайянеро анҷом додаанд.
Новобаста аз мушкилоти ҷойдошта нақшаи тоза намудани шабакаҳои обёрӣ, заҳбуру заҳкашҳо ва таъмири иншооти гидротехникӣ ба иҷро расида, шабакаҳои обёрии байнихоҷагӣ ба мавсими обдиҳии ҳосили соли 2015 омода шудаанд.