Ситоди ҳолатҳои фавқулодаи ВМКБ: «Дарёи Ғунд ба маҷрои пешини худ равон аст»

Душанбе, 20.07.2015. АМИТ «Ховар»,).-Ба иттилои муовини  сардори ситоди ҳолатҳои фавқулодаи Вилояти Мухтори Кӯҳистони Бадахшон подполковник Миралӣ Ҳалимов соати 01.00 шаби гузашта   дар мавзеи осебдидаи деҳаҳои ноҳияи Шуғнон боз сел омада, маҷрои дарёи Ғунд  ба муддати 15 дақиқа банд шуда буд. Пас аз  анҷом додани корҳои фаврӣ аз ҷониби кормандони ситоди ҳолатҳои фавқулодаи вилоят ҳоло дарё ба маҷрои пешини худ равон аст.
Ба иттилои раиси ноҳияи Шуғнон Азиз Гиёев, дар ин лаҳзаҳо дар мавзеи машқгоҳи ҳарбии деҳаи Манеми ҷамоати деҳоти Сучони ноҳия ҷудо кардани замин барои зарардидагони офат ҷараён дорад. Дар ин мавзеъ 22 гектар замин барои зарардидагон ҷудо гардидааст. Ҳоло корҳои омодагӣ барои ҷудо кардани қитъаи замин ба 72 оила идома доранд. Дар назар аст, ки ба ҳар оила 6 садякӣ замин ҷудо шавад. Пас аз ба анҷом расидани ин корҳо қуръапартоӣ сурат мегирад.