Суди Ироқ 24 нафар ҷангиёни ДИ – ро ба қатл ҳукм кард

Душанбе, 10.07.15. (АМИТ «Ховар»). – Суди  Ироқ  дар  ҳаққи  24  нафар  ҷангиёни «Давлати  исломӣ»  барои  куштори қариб 1700  нафар  сарбозон моҳи  июни  соли  2014 ҳукми  қатл  баровард. 
Аксарияти  қурбониёни  исломгароён  сарбозони  нав аз  ҷумлаи мазҳаби  шиа  буданд, ки  баъди пойгоҳи  низомии Кэмп  Шпейхери  назди  шаҳри  Тикритро забт  намудани   исломгароён  кушта шуда буданд. 
Низомиёни  Ироқ баъди моҳи  марти  соли  2015 аз  силоҳбадастон озод  намудани шаҳри  Тикрит  даҳҳо   нафареро, ки  ба  куштор   гумонбар  шуда буданд, ҳабс  карданд. Коршиносони  мақомоти  судӣ  ҳамчунин ба эксгуматсияи (аз гӯр кашида баровардани мурдаҳо ба  мақсади тафтишоти  судию  тиббӣ) ҷасади кушташудагон  дар  ин  минтақа   шурӯъ  карданд. Ҳоло аз  чор қабристон  беш  аз  470  ҷасад пайдо гардидааст. 
Суди  шаҳри  Бағдод  айбдоршавандагон – 24  нафар  шаҳрвандони  Ироқро ба  кашидан  ба  дор  ҳукм кард. Онҳо  ҳамчунин  ба куштор ва  иштирок дар  фаъолияти террористӣ айбдор  шуда буданд. 
Боз 604  нафар  гумонбарон  аз рӯи  ин парванда дар  ҷустуҷӯ  қарор  доранд. Тафтишот  муайян  намуд, ки  ҷангиён як  қисми ҷасадҳоро  ба дарёи Даҷла  партофта, боқимондаашонро  дар атрофи  шаҳр гӯр  кардаанд. То имрӯз 12  чунин  гӯристонҳои оммавӣ пайдо шудаанд.