Тадбирҳо оид ба пешгирии ҳодисаҳои харобиовар дар ҷумҳурӣ

Душанбе,  28.07.2015 (АМИТ «Ховар», Назири Назир).-27 июли соли ҷорӣ барои мусоидат дар бартараф намудани оқибатҳои ҳодисаҳои ғайричашмдошт, ки ҳафтае қабл дар ноҳияҳои Шуғнон, Ванҷ ва Рашт ба вуқўъ пайвастанд, бо иштироки роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон ва дигар воҳидҳои сохтории он, аз ҷумла масъулини Агентии обуҳавошиносӣ ҷаласаи васеъ доир гардид. Раиси кумита Хайрулло Ибодзода зикр кард, ки барои расонидани кумак ба оилаҳои аз офати табиӣ зарардида ва минбаъд сари вақт огоҳонидани мардум аз чунин хатарҳо кумита бояд аз тамоми имкониятҳо истифода барад.
Зикр шуд, ки гармшавии бесобиқаи иқлими сайёраи Замин вақтҳои охир ҷомеаи ҷаҳониро ба ташвиш овардааст. Чуноне аз ҳодисаҳои харобиовар дар ин ё он мамлакат аз тариқи воситаҳои ахбори оммаи ватанӣ ва хориҷӣ аён мегардад, ҳамасола ба зиндагии инсоният омилҳои фалокатбори табиӣ бештар таҳдид доранд. Аз ин хатарҳои экологӣ Ҷумҳурии Тоҷикистон, ки ҷузъи ҷудонопазири минтақаи ҷаҳон аст, дар канор буда наметавонад.
Муовини раиси кумита Ойхон Шарифова ва директори Агентии обуҳавошиносӣ Ҳомидҷон Расулзода доир ба вазъи иқлим ва пешгирии офатҳои табиӣ сухан гуфтанд.