Тоҷикистон хоҳони ба сатҳи сифатан наву баланд баровардани ҳамкориҳо дар самти ҷалби сармоя бо Ҳиндустон аст

Душанбе, 13.07.2015. (АМИТ «Ховар»). — «Ҷониби Тоҷикистон ҳамоно хоҳони ба сатҳи сифатан наву баланд баровардани ҳамкориҳояш бо Ҳиндустон дар соҳаи ҷалби сармояҳо мебошад», — — ин нуктаро Президенти Ҷумҳурии Тоҷикистон Эмомалӣ Раҳмон дар изҳороти матбуотӣ пас аз анҷоми музокироти байнидавлатии Тоҷикистону Ҳиндустон баён дошт. 
Сарвари давлат Эмомалӣ Раҳмон гуфт: «Мо аз он қаноатмандем, ки байни роҳбарияти ду давлат сатҳи баланди эътимод ва ҳамраъйӣ таъмин гардида, ҳамкории дуҷониба ва чандҷониба пайгирона густариш меёбад». 
Президенти Тоҷикистон бори дигар дўстони ҳиндустонии худро мутмаин сохт, ки Ҷумҳурии Тоҷикистон дар рушду таҳким ва тавсеаи минбаъдаи ҳамкориҳои судманд бо Ҷумҳурии Ҳиндустон самимона манфиатдору алоқаманд буда, дар пешбурди ин самти муҳими фаъолияти байнидавлатиаш саъю эҳтимоми худро дареғнахоҳад дошт. «Мо комилан омодаи он ҳастем, ки ҷиҳати истифодаи пурсамари имконоти бузурги ҳамкории гуногунсоҳаи ду кишвар тамоми тадбирҳои заруриро амалӣ созем», — таъкид дошт Эмомалӣ Раҳмон ва афзуд, ки: «Мо омодаем, ки фаъолияти сармоягузорони Ҳиндустонро дар ин бахш, аз ҷумла дар заминаи кори чор минтақаи озоди иқтисодии Тоҷикистон, минбаъд низ пуштибонӣ намоем».