Вазъи худкушӣ дар байни занон ташвишовар боқӣ мемонад

Душанбе, 15.07.2015. (АМИТ «Ховар», Лайло Тоирӣ).-Муовини якуми раиси Кумитаи кор бо занон ва оилаи назди Ҳукумати Ҷумҳурии Тоҷикстон Марҳабо Олимӣ ҳолати худкушии занонро дар шашмоҳаи сипаригардида таҳлил намуда, гуфт, ки ҳарчанд ҳолати ногувори ҳодисаҳои худкушӣ дар байни занон тамоюли пастравӣ дорад, вале он то ҳол ташвишовар боқӣ мемонад. Ин андеша зимни як машварат дар Кумитаи кор бо занон ва оилаи назди Ҳукумати Ҷумҳурии Тоҷикистон оид ба вазъи  худкушӣ дар байни занон таъкид гардид. 
Дар машварат муовини Сарвазири Ҷумҳурии Тоҷикистон Марҳабо Ҷабборӣ, сардори Раёсати рушди иҷтимоии Дастгоҳи иҷроияи Президенти Ҷумҳурии Тоҷикистон Гулҷаҳон Абдуфаттоҳзода, устоди калони Донишгоҳи миллии Тоҷикистон Давлатзода Маҳмадулло ва сардорони раёсатҳои вилоятҳои Мухтори Кӯҳистони Бадахшон, Суғд, Хатлон, шаҳри Душанбе иштирок доштанд.
Муовини  Сарвазири Ҷумҳурии Тоҷикистон Марҳабо Ҷабборӣ аз ҳодисаҳои рӯзҳои охир изҳори ташвишу нигаронӣ намуда, аз иштирокчиён талаб намуд, ки масъулиятро ба уҳда гирифта, нисбат ба масълаҳои ба миён омада тадбирҳои мушаххас андешанд.