Вуруди беш аз 3 миллиард сомонӣ андоз ва дигар пардохтҳои ҳатмӣ ба буҷет

      Душанбе, 20.07.2015.(АМИТ «Ховар», Марзия Саидзода).-«Иҷрои нақшаи андозҳо  ва дигар пардохтҳои ҳатмӣ аз ҷониби мақомоти андози кишвар дар нимсолаи аввали соли равон 102,7 % таъмин гардид»,- гуфт 20 июл дар ҷамъи хабарнигорон Нусратулло Давлатзода -раиси Кумитаи андози назди Ҳукумати Ҷумҳурии Тоҷикистон. Мавсуф афзуд, ки дар ин давра аз ҳисоби андоз ва дигар пардохтҳои ҳатмӣ ба буҷети кишвар 3 миллиарду  780, 6 миллион сомонӣ ворид шуд, ки нисбат ба ҳамин давраи соли гузашта 450 миллион сомонӣ ё 13,5 % зиёд мебошад. 
         Зикр шуд, ки дар ин давра  иҷрои нақшаи воридоти андозҳо ва пардохтҳо  бо назардошти андози иҷтимоии ғайрибуҷетӣ дар Вилояти Мухтори Кӯҳистони Бадахшон 112,4 %, вилояти  Хатлон 105,1 %, вилояти Суғд 98,6% ва шаҳри Душанбе 100,8 % таъмин гардидааст.
       Раиси Кумитаи андози кишвар афзуд, ки мақомоти андози ҷумҳурӣ фаъолияти худро дар партави дастуру супоришҳои Ҳукумати  Ҷумҳурии Тоҷикистон ва Президенти кишвар Эмомалӣ Раҳмон дар самти ғанӣ гардонидани буҷаи ҷумҳурӣ роҳандозӣ намуда, барои беҳтар сохтани хизматрасонӣ ба шаҳрвандон ва андозсупорандагон тадбирҳои саривақтӣ ва мушаххас меандешанд.