Афғонистон: Дар Бағлон оташзании масоҷид идома дорад

Душанбе, 07.08.2015 (АМИТ «Ховар»). — Дар шимоли музофоти Бағлони Афғонистон оташ задани масҷидҳо идома дорад. Ҳафтаи гузашта бар асари чунин вайронкориҳо бинои 12 масҷид хароб гардид.
Бино ба иттилои шабакаи телевизионии «Тулӯъ», ҳодисаи оташзанӣ аксарияти мардуми маҳаллиро ба хашм овард, ки ба таҳдиди ҳамлаи бадхоҳон нигоҳ накарда, борҳо тамоми нерӯи худро ба хомӯш кардани сӯхтор равона кардаанд. Сабаби ин ҳаводис то ҳанӯз номаълум боқӣ мемонад. 
Аҳолии маҳаллӣ амалҳои вайронкориро сахт маҳкум карда, аз Ҳукумат талаб намудаанд, ки ҳарчи зудтар гунаҳкоронро дастгир намояд.
Кормандони полис дар сӯзондани масҷидҳо ҳаракати Толибонро айбдор мекунанд, вале дар ин минтақа ҷонибдорони гурӯҳи ба ном «Давлати исломӣ» низ фаъолият доранд.