Корҳои фаҳмондадиҳӣ дар Кӯлоб

Душанбе, 31.08.2015 (АМИТ «Ховар»).- Шуъбаи кор бо занон ва оилаи мақомоти иҷроияи ҳокимияти давлатии шаҳри Кӯлоб ҷиҳати пурзӯр намудани корҳои фаҳмондадиҳии оммавӣ ва инфиродӣ чораҳои мушаххас андешида, ҳаррӯза бо табақаҳои гуногуни аҳолӣ вохӯриҳо анҷом дода истодааст. Танҳо дар моҳи августи соли ҷорӣ аз ҷониби кормандони шуъба зиёда аз 20 вохӯриҳои оммавӣ анҷом дода шуда, бо усули «хона ба хона» аз аҳволи зисти зиёда аз 45 оилаҳои осебпазир бархӯрдор шуданд.
Дар рафти суҳбату вохӯриҳо ба масоили баланд бардоштани маърифат ва саводнокии бонувон, эҳтиром ба фарҳанги миллӣ ва оиладорӣ, арҷгузорӣ ба либоси миллӣ, тарбияи фарзандон дар руҳияи ватанпарастию инсондӯстӣ, пешгирии ҷудошавии оилаҳо, хурофотпарастӣ, худкушию худсӯзии занону ҷавондухтарон, тақлидкорӣ ба тарзи либоспӯшии бегона диққати ҷиддӣ дода мешавад.
Занону ҷавондухтарони кӯлобӣ низ аз ҷониби худ дар рафти суҳбату вохӯриҳо ташаббус нишон дода, фикру ақидаҳои хешро баён медоранд, мушкилоти зиндагиашонро ироа менамоянд ва оид ба беҳтар сохтани шароити бонувон таклифу пешниҳодҳо манзур менамоянд.