Марди 33 сола бо гумони таҷовуз ба номус ва духтари 19 сола бо гумони рабудани автомашина дастгир гардиданд

Душанбе, 22.08.2015. (АМИТ «Ховар»).- Аз тарафи кормандони Вазорати корҳои дохилӣ зимни гузаронидани чорабиниҳои оперативӣ-ҷустуҷӯӣ сокини 33-солаи ноҳияи Файзобод бо гумони содир кардани ҷинояти вазнин — таҷовуз ба номус дастгир гардид. Муайян карда шуд, ки ин мард ба хонаи зани 36-сола — истиқоматкунандаи ноҳияи Файзобод рафта, бо роҳи зӯроварӣ ба номуси духтари ноболиғи 16-солаи ӯ таҷовуз намудааст. Нисбат ба ҳодисаи мазкур парвандаи ҷиноятӣ оғоз гардида, тафтишот идома дорад.
Мувофиқи иттилои Вазорати корҳои дохила, дирӯз, 21-уми августи соли равон аз назди бинои «Кохи Борбад» автомашинаи тамғаи «Ниссан-Максима» аз тарафи шахси номаълум рабуда шуд. Соҳиби автомашина дар ин хусус бо ариза ба шуъбаи ВКД дар ноҳияи Сино муроҷиат кард ва зимни гузаронидани чорабиниҳои фаврӣ-ҷустуҷӯӣ кормандони милитсия бо гумони рабудани автомашинаи мазкур, ҷавондухтари 19-солаи сокини Душанберо дастгир карданд. Ҳоло тафтишоти ҳодисаи мазкур идома дорад.