Сафари кории Сарвари давлат дар Кӯлоб аз зиёрати оромгоҳи Мир Сайид Алии Ҳамадонӣ оғоз гардид

Душанбе, 31.08.2015. (АМИТ “Ховар”). — Сафари кории Президенти мамлакат Эмомалӣ Раҳмон ба шаҳри Кӯлоб бо зиёрати оромгоҳи орифи бузурги Машриқзамин Мир Сайид Алии Ҳамадонӣ, ки имсол 700 — солагии ӯ дар саросари кишвар ҷашн гирифта мешавад, оғоз гардид.
Дар назди оромгоҳ барои пойдории сулҳу субот, таҳкими Ваҳдати миллӣ ва пешрафту шукуфоии Тоҷикистон дуову фотиҳа карданд. 
Дар саҳни ҳавлии оромгоҳ намоишнома аз ҳаёти ибратомӯзи ин орифи бузург нишон дода шуд.
Сарвари давлат Эмомалӣ Раҳмон дастур дод, ки асарҳои Мир Сайид Алии Ҳамадонӣ чоп ва дастраси мардум гарданд, зеро мазмуну муҳтавои асарҳои ин аллома дар тарбияи маърифатнокӣ, худшиносӣ ва таҳкими ваҳдату ягонагӣ ва меҳру муҳабати байни ҳамдигарӣ хеле судбахш хоҳанд буд.
Мавриди зикр аст, ки ба ифтихори ин санаи муҳим бо дастгирии бевоситаи Президенти мамлакат Эмомалӣ Раҳмон Осорхонаи шафати оромгоҳ ва гунбазҳои мақбараи Мир Сайид Алии Ҳамадонӣ азнавсозӣ карда шуд.  

Дар ин ҷо Сарвари давлат Эмомалӣ Раҳмон диққати кормандони осорхонаро ба корҳои ободонӣ ҷалб намуд, зеро ҳамасола шумораи зиёди сайёҳони хориҷӣ, бахусус онҳое, ки аз зиндагии ибратбахш ва осори гаронарзиши пур аз пандуахлоқии Мир Сайид Алии Ҳамадонӣ огоҳ ҳастанд, барои зиёрат ба ин ҷо ташриф меоранд.