Шуъбаи нави АНМН дар ноҳияи Ҷиргатол

Душанбе, 13.08.2015. (АМИТ «Ховар», Лайло Тоирӣ).-  Дар  ноҳияи Ҷиргатол 12 август маросими кушода шудани Шуъбаи нави Агентии назорати маводи нашъаовари назди Президенти ҶТ баргузор гардид, ки дар он Директори агентӣ генерал-лейтенати милитсия Рустам  Назарзода, Сафири Фавқулодда ва Мухтори ИМА дар Тоҷикистон Сюзан М. Эллиот, Раиси ноҳияи Ҷиргатол Умедхоҷа Зойир, намондагони мақомоти ҳифзи ҳуқуқ ва сохторҳои қудратии ноҳия иштирок намуданд. 
Шуъба бо дастгирии Сафорати ИМА дар Тоҷикистон сохта ба истифода дода шуд. Шуъбаи нави агентӣ бо мақсади пурзӯр намудани мубориза бар зидди муомилоти ғайриқонунии маводи нашъаовар ва пешгирӣ намудани интиқоли маводи мухаддир тавассути қаламрави Тоҷикистон ба Қирғизистон сохта шуд. 
Директори агентӣ ва Сафири ИМА дар Тоҷикистон санади қабули биноро имзо намуданд. Меҳмонон бинои нави Шуъбаро аз назар гузарониданд. Шуъбаи нави агентӣ дорои таҷҳизоти ҳозиразамон, таъмини барқ ва системаи гармидиҳӣ мебошад.