Таркиш дар Чин боиси марги 42-нафар ва захмбардоштани 400-тани дигар гардид

Душанбе,13.08. 2015 (АМИТ «Ховар», Саидҷаъфар Ашӯрзод).-Бар асари таркиш дар анбори маводҳои  моеи шаҳри Тянтсзини  Ҷумҳурии Мардумии Чин 42-нафар ба ҳалокат расида, зиёда аз 400-тани дигар ҷароҳатҳои гуногуни ҷисмонӣ бардоштаанд.
Тавре хабар дода мешавад, дар натиҷаи ин таркиши мудҳиш ҳатто то масофаи 2 км тирезаҳои манзилҳои зист шикаста, бештар аз ҳазор нақлиёти гирду атрофи макони ҳодиса зарар дидаанд. Мутахаассисон ва кормандони Хадамоти оташнишонӣ изҳор доштаанд,  баъд аз таркиши дар маҷмуъ 3-тонна тротил, дарҳол сӯхтор сар задааст.Дар ҷараёни амалиёти оташнишонӣ низ дар ин анбор чанд таркиши дигар ба қайд гирифта шудааст. Бо вуҷуди хомӯш намудани қисми бештари оташ, то ҳанӯз дар бораи  20-корманди Хадамоти оташнишонӣ, ки баъди таркишҳои такрорӣ нопадид гардида буданд, маълумоте  дастрас  нагардидааст. Масъулини шаҳри  Тянтсзин дар мавриди дастгир шудани шахсони масъули анбор хабар додаанд.