Тирпарронӣ бо ҷалби шаҳрвандони дар эҳтиётбуда

Душанбе, 10.08.2015. (АМИТ «Ховар», Лайло Тоирӣ).-Ҷамъомади методию таълимие, ки дар ноҳияи Рӯдакӣ бо ҷалби бештари аҳолии қобили хизмат, доир карда шуд, нисбат ба солҳои қаблӣ аз ҳар ҷиҳат фарқкунанда буд. Зеро дар навбати аввал масъулини комисариати ҳарбии ноҳия бо шаҳрвандон сӯҳбату мулоқот карда, аҳамияти ташкилу гузаронидани ин қабил ҷамъомадҳоро дар тарбияи ҳарбию ватандӯстӣ муҳим баррасӣ намудаанд.
Дар  ҷамъомад ҷавонони синну соли гуногун ва дигар шаҳрвандони дар эҳтиёт қарор дошта, бо навъҳои гуногуни яроқ шинос карда шуда, аз ҷониби масъулин тарзи дуруст итифода намудани яроқ ва қоидаҳои бехатарии он нишон дода шуд.
Зимни баргузории ҷамъомади навбатӣ аён гардид, ки сарбозону афсарони дар эҳтиёт қарор доштаи ноҳия маҳорату малакаи хуб нишон дода, дар  баҳадафрасонии тирҳо аз яроқҳои оташфишон низ пешсаф буданд. Умуман ҷамъомадҳои методию таълимӣ ва машғулиятҳои амалии саҳроӣ дар ҳудуди Ҷумҳурии Тоҷикистон зиёд доир карда мешаванд, зеро шароти кӯҳии Тоикистон дар ташкилу гузаронидани ин қабил чорабиниҳо хело ҳам мусоид мебошад.