761 млн сомонӣ барои мусоидат ба рушди соҳибкорӣ ва беҳтар намудани вазъи рӯзгори сокинони Турсунзода

Душанбе, 18.09.2015. (АМИТ «Ховар»). – “Дар давоми солҳои 2006-2014 ва ҳашт моҳи соли ҷорӣ аз ҷониби  бонкҳо ва дигар ташкилоти қарздиҳӣ ба аҳолии шаҳри Турсунзода ба маблағи умумии 761 миллион сомонӣ қарз дода шудааст, ки ин иқдом ба рушди соҳибкории хурду миёна ва беҳтар намудани вазъи рӯзгори сокинон мусоидат менамояд”, — гуфт Сарвари давлат Эмомалӣ Раҳмон дар мулоқот бо роҳбарон ва сокинони шаҳри Турсунзода. 
Президенти кишвар афзуд, ки тибқи маълумот соли гузашта аз ҷониби корхонаҳои саноатии шаҳр ба маблағи 372 миллион сомонӣ ва дар ҳашт моҳи соли равон дар ҳаҷми беш аз 338 миллион сомонӣ маҳсулоти саноатӣ истеҳсол шудааст.
“Бинобар ин, Кумитаи давлатии сармоягузорӣ ва идораи амволи давлатӣ, Вазорати саноат ва технологияҳои нав ва мақомоти иҷроияи ҳокимияти давлатии шаҳри Турсунзодаро зарур аст, ки доир ба масъалаи рушди соҳибкорӣ, ташкили коргоҳу корхонаҳои муосири истеҳсолӣ ва  пайдо намудани сарчашмаҳои нави даромад мунтазам чораҷӯӣ намоянд”, — дастур дод Сарвари давлат Эмомалӣ Раҳмон.