Адвокати қаллоб

Душанбе, 29.09.2015. (АМИТ «Ховар»).-Шаҳрванд Ёров Бузургмеҳр Равшанович, санаи таваллудаш 09 июли соли 1971, сокини шаҳри Душанбе, кӯчаи М.Миршакар, хонаи №66, дар вазифаи адвокати Коллегияи адвокатҳои ҶТ фаъолият намуда, бо роҳи қаллобӣ аз шаҳрвандон маблағҳои махсусан калони пулиро тасарруф намудааст. Чунончи, тахминан моҳи июли соли 2010 ба бовари шаҳрванд Бозоров Комилҷон, сокини ш. Истаравшан, кӯчаи Ғозиев, хонаи № 43 даромада, бо сӯйистифода аз ҳолати оҷизӣ ва вазъияти шадиди ноилоҷии охирин, ваъда додааст, ки бинобар доштани шиносҳои зиёд дар мақомоти ҳифзи ҳуқуқ ва судӣ метавонад писари охирин, яъне Бозоров Дилшод Қомилҷоновичро аз ҷавобгарии ҷиноятӣ бо моддаи 32 қисми 3 (Сӯиқасди ҷиноят), 104 қисми 2 банди “ё” (Одамкушӣ) КҶ Ҷумҳурии Тоҷикистон озод намояд. Сипас, аз дасти К.  Бозоров маблағи баробар ба 4000 (чор ҳазор) доллари ИМА-ро гирифта, ба манфиати худ сарф намуда, ягон кумаки ҳуқуқӣ нарасонидааст.
Инчунин талони муоинаи техникиро қалбакӣ сохта истифода намудааст. Бинобар ин, бо дастрасии моддаҳои 140, қ.6 м.145 ва 146 КМҶ Ҷумҳурии Тоҷикистон ва моддаҳои 247 (Қаллобӣ) ва 340 (Сохтакорӣ) КҶ Ҷумҳурии Тоҷикистон нисбат ба Б. Р Ёров парвандаи ҷиноятӣ оғоз карда шуда, тафтиши пешакӣ идома дорад.
Аз тамоми шаҳрвандоне, ки аз чунин кирдорҳои ҷиноятии Б. Р. Ёров зарари моддию маънавӣ дидаанд, хоҳиш карда мешавад, ки ба телефонҳои боварии  221-21-21 ва 221-08-30 ба Вазорати корҳои дохилии ҶТ муроҷиат намоянд.