Ҷаласаи Шӯрои вазирони корҳои дохилии ИДМ дар Минск

Душанбе, 04.09.2015 (АМИТ «Ховар»).-Рӯзҳои 2-юм ва 3-юми сентябри соли равон дар шаҳри Мински Ҷумҳурии Беларус ҷаласаи навбатии Шӯрои вазирони корҳои дохилии давлатҳои аъзои Иттиҳоди Давлатҳои Мустақил баргузор гардид, ки дар кори он ҳайати намояндагони Вазорати корҳои дохилии Тоҷикистон таҳти роҳбарии муовини аввали Вазири корҳои дохилӣ иштирок доштанд. 
Дар ҷаласаи мазкур масъалаҳои афзалиятноки ҳамкориҳои Вазоратҳои корҳои дохилии кишварҳои аъзои ИДМ, рафти амалисозии барномаҳои байнидавлатӣ дар мубориза бо ҷинояткорӣ баррасӣ гардид.
Инчунин дар рафти мулоқот дар атрофи лоиҳаҳои ҳуҷҷатҳо оид ба ҳамкории кишварҳои ИДМ дар мубориза бо ҷиноятҳо дар самти технологияи иттилоотӣ, маҷмӯи чорабиниҳо вобаста ба муккамалнамоии ҳамкориҳои мақомоти корҳои дохилӣ дар муқобилият ба дуздии воситаҳои нақлиётӣ, тасдиқи дастурамал дар бораи тартиби фаъолияти махзани махсусгардонидашудаи дорои маълумотҳои Бюрои ҳамоҳангсозии мубориза бар зидди ҷиноятҳои муташаккил ва дигар намуди ҷиноятҳои хавфноки (БКБОП) ИДМ низ мубодилаи афкор сурат гирифт.