Ҷараёни амалиёти махсус дар Ромит: 3 нафар аъзои фаъоли гурӯҳи террористии ҳоҷӣ Ҳалим дастгир гардиданд

Душанбе, 14.09.2015. (АМИТ «Ховар»). — Марказҳои матбуоти Вазорати корҳои дохилӣ ва робитаҳои ҷамъиятии Кумитаи давлатии амнияти миллии Ҷумҳурии Тоҷикистон хабар медиҳанд, ки рӯзи 13-уми сентябри соли 2015 аз ҷониби кормандони ВКД, КДАМ ва дигар сохторҳои қудратии ҷумҳурӣ зимни гузаронидани амалиёти махсус дар дараи Ромити ноҳияи Ваҳдат 3 нафар аъзои фаъоли гурӯҳи террористии Назарзода Абдуҳалим Мирзо (ҳоҷӣ Ҳалим) дастгир гардиданд.
Инчунин аз ин гурӯҳи ҷиноятпеша як автомати «АКМ», як таппончаи «Макаров» ва миқдори зиёди лавозимоти дигари ҷангӣ дарёфт ва мусодира шуд.
Вазорати корҳои дохилӣ ва Кумитаи давлатии амнияти миллии ҷумҳурӣ барои ҳамкории фаъолона ва расонидани кумак ҷиҳати дастгир намудан ва несту нобуд гардонидани гурӯҳи ҷиноятпешаи Назарзода А.М. ба шаҳрвандон миннатдории худро изҳор менамоянд.
Хотиррасон менамоем, ки касоне, ки яроқу аслиҳа ва дигар лавозимоти ҷангиро муайян намуда, ихтиёран ба мақомоти ҳифзи ҳуқуқ месупоранд ё хабар медиҳанд, ба ҷавобгарӣ кашида намешаванд.
Амалиёти якҷояи сохторҳои қудратии кишвар дар дараи Ромити ноҳияи Ваҳдат оид ба безарар гардонидани аъзои гурӯҳи террористии Назарзода А.М. идома доранд.
Телефони боварӣ: 221-21-21, 227-98-98.