Баррасии масоили буҷети давлатӣ барои соли 2016

Душанбе, 29.09.2015. (АМИТ «Ховар»). — Имрўз дар ҳузури Сарвазири мамлакат  Қоҳир Расулзода ҷаласаи Комиссияи доимамалкунандаи буҷетӣ баргузор гардид.
Дар ҷаласа масъалаҳои вобаста ба лоиҳаи  Қарори Ҳукумати Ҷумҳурии Тоҷикистон «Дар  бораи лоиҳаи   Қонуни Ҷумҳурии Тоҷикистон «Дар бораи буҷети давлатии Ҷумҳурии Тоҷикистон барои соли 2016» ва нишондиҳандаҳои буҷети давлатӣ барои солҳои 2017-2018» ва лоиҳаи Қарори Ҳукумати Ҷумҳурии Тоҷикистон «Дар бораи маъқул донистани «Барномаи давлатии қарзгирии берунаи Ҷумҳурии Тоҷикистон барои солҳои 2016-2017»»  мавриди баррасӣ қарор дода шуд.
Доир ба масъалаҳои рўзномаи кории ҷаласа роҳбарони аввали вазорату идораҳои дахлдори ҷумҳурӣ баромад намуда, фикру мулоҳизаҳои хешро баён намуданд. 
Дар маҷмўъ, лоиҳаи қарорҳои пешниҳодгардида қобили қабул дониста шуда, вазорату идораҳои дахлдори мамлакат вазифадор гардиданд, ки дар якҷоягӣ бо назардошти таклифу пешниҳодҳо ва  имкониятҳои  мавҷуда  лоиҳаҳои қарорҳоро такмил дода, барои баррасӣ ба Ҳукумати Ҷумҳурии Тоҷикистон пешниҳод намоянд.