Дар Душанбе намоишгоҳи молҳои Равалпиндӣ гузаронида мешавад

               Душанбе, 04.09.2015.(АМИТ «Ховар», Марзия Саидзода).- Покистон тасмим гирифтааст, ки охири моҳи октябр дар Душанбе намоишгоҳи молҳои истеҳсолии шаҳри Равалпиндӣ ва ҳамоиши доираҳои тиҷоратии Тоҷикистону Покистонро баргузор намояд. Масъалаи мазкур дар мулоқоти Шариф Саид -раиси Палатаи савдо ва саноати Тоҷикистон бо Тариқ Иқбол Соомро- сафири фавқулодда ва мухтори Ҷумҳурии Исломии Покистон дар Ҷумҳурии Тоҷикистон баррасӣ гардид.
     Назар ба иттилои Мукаммал Раҷабӣ -сухангӯи Палатаи савдо ва саноати кишвар мусоҳибон дар мулоқот масъалаҳои тақвияти ҳамкории иқтисодию тиҷоратии байни  ду кишварро матраҳ намуданд. «Тоҷикистон ба дурнамои ҳамкории иқтисодию тиҷоратӣ бо Покистон хушбин аст»,  афзуд Шариф Саид. Мавсуф баргузории намоишгоҳҳои  молҳои истеҳсоли Покистонро дар Душанбе қадами устувор дар роҳи тавсеаи ҳамкории иқтисодӣ, ҷалби сармояи покистонӣ ба иқтисоди кишвар, ташкили корхонаҳои муштараки истеҳсолӣ, дарёфти шарикони тиҷоратӣ ва шинохти бозорҳои ҳар ду кишвар унвон кард. 
         Дипломати покистонӣ афзуд, ки Тоҷикистон барои Покистон,  яке аз шарикони боэтимоди иқтисодию тиҷоратист. Умед аст, ки ташкили намоишгоҳи молҳои Покистон ва ҳамоиши доираҳои тиҷоратии ҳар ду кишвар дар Душанбе заминаи мусоидро дар рушди минбаъдаи таҳкими ҳамкориҳои  иқтисодии ду кишвар фароҳам хоҳад овард.