Эмомалӣ Раҳмон: «Азхудкунии илму дониш шарти асосии камолоти инсонист»

Душанбе, 18.09.2015.(АМИТ «Ховар»).-«Аҷдоди шарафманд ва фарҳангдӯсти мо мактабро ҳамеша макони муқаддас ҳисобида, азхудкунии илму донишро шарти асосии камолоти инсонӣ медонистанд.  Маҳз дар натиҷаи арҷгузорӣ ба мақоми илму дониш ва саводу маърифат ҳазорон донишмандону нобиғаҳои номдор дар домани ин миллати куҳанбунёд ба камол расида, дар ганҷинаи тамаддуни башар саҳми пурарзиш гузоштаанд»,-гуфт Президенти Ҷумҳурии Тоҷикистон  Эмомалӣ Раҳмон имрӯз, 18 сентябр зимни маросими ифтитоҳи мактаби рақами 119 дар ҷамоати деҳоти Раҳмонови шаҳри Турсунзода.
Ҳар сол дар остонаи ҷашни солгарди Истиқлолияти давлатии Ватани азизамон ва оғози соли нави таҳсил дар шаҳру ноҳияҳои мамлакат дар қатори ба истифода додани теъдоди зиёди иншооти таъйиноти гуногун, инчунин даҳҳо муассисаҳои нави таълимӣ ифтитоҳ гардида, барои таҳсили толибилмон тамоми шароити замонавӣ фароҳам оварда мешавад.    
-Мактаби таҳсилоти умумии рақами 119  таълимгоҳи дуюми наву замонавӣ дар шаҳри Турсунзода аст, ки ифтитоҳи расмии он аз вусъати сиёсати созандаи давлату Ҳукумат ва дастгирии доимии соҳаи маориф дар даврони соҳибистиқлолӣ дарак медиҳад,-изҳор намуд Сарвари давлат.