Эмомалӣ Раҳмон: “Ман қариб дар ҳамаи мулоқоту чорабиниҳо масъалаи захираи маводи ғизоӣ ва омодагӣ ба тирамоҳу зимистонро таъкид менамоям”

Душанбе, 18.09.2015. (АМИТ «Ховар»). –Президенти кишвар Эмомалӣ Раҳмон зимни мулоқот бо роҳбарон ва сокинони шаҳри Турсунзода 18 сентябр гуфт: “Бо истифода аз ҳузури роҳбарону фаъолони шаҳр, аҳли зиё, шахсони обрӯманду рӯзгордида, падару модарони арҷманд ва бонувону ҷавонони иззатманд мехоҳам як масъалаи ниҳоят муҳимро таъкид намоям. Ҳамаи шумо аз вазъи ҷаҳони пурмоҷаро ва пурҳаводиси имрӯза хуб огоҳ мебошед”.
Сарвари давлат таъкид дошт, ки дар чунин шароит ҳар яки моро зарур аст, ки бисёр ҳушёру зирак бошем, манфиатҳои давлату миллатро аз тамоми манфиатҳои дигар боло гузорем, хусусан фарзандони худ ва ҷавононро аз ҳар гуна қонуншиканӣ ва пайвастан ба ҳаракату гурӯҳҳои ифротгарову террористӣ, ки ваҳшонияти асримиёнагии онҳо имрӯз аҳли башарро ба даҳшат андохтааст, эмин нигоҳ дорем. 
“Чунон ки медонед, ман қариб дар ҳамаи мулоқоту чорабиниҳо масъалаи захираи маводи ғизоӣ ва омодагӣ ба тирамоҳу зимистонро таъкид менамоям. Бо дарназардошти он, ки аз рӯи тамоми аломатҳо тирамоҳу зимистони имсола тӯлониву сард омаданаш аз эҳтимол дур нест, ман ин масъаларо дар суханронии худ дар Донишгоҳи давлатии Кӯлоб махсус хотирнишон намудам. Ва ҳоло бори дигар ҳамаи роҳбарону масъулон ва аҳолиро огоҳ месозам, ки ба ин масъала бисёр ҷиддӣ муносибат кунанд”, — таъкид намуд Сарвари давлат Эмомалӣ Раҳмон.