Хадамоти амнияти Марокаш гурӯҳи террористони ҷонибдори «Давлати Исломӣ» — ро ҳабс карданд

Душанбе, 22.09.15. (АМИТ «Ховар»). — Дар  баённомаи Вазорати   корҳои  хориҷии  Марокаш  гуфта  мешавад, ки  хадамоти  амнияти кишвар   шаш  нафар  террористонеро, ки ба   нақшаҳои  расонидани  зарари  ҷиддӣ  ба  амнияту  суботи  шоҳигарӣ  ҷалб  шуда буданд, ҳабс  карданд. 
Шахсони  ҳабсшуда  дар  шаҳрҳои  Тетуан  ва Бени Меллял,  ҳамчунин  дар  ҳудуди  ноҳияҳои  Бени Зрантал,  Тагзирт, Фум,  Лаансар ва Сиди Аллал — ал — Баҳравӣ  ба тахрибкорӣ  машғул буданд. Маълум  шуд, ки онҳо  бо  гурӯҳи  террористии  «Ҷанговарони  халифати  Марокаш» робита  дошта, 12  сентябр  сохторҳои  қудратӣ  фаъолонашонро  ба  ҳабс  гирифта  буданд.  Ҷинояткорон  дар  қаламрави  Марокаш  амалиёти  террористиро рӯи  кор  оварда,  барои озод  намудани шахсони ҷонибдори гурӯҳи  ифротталаби «Давлати  исломӣ» ба   зиндонҳо  ҳамла оварданӣ  буданд. 
Ба  фикри  таҳлилгарони  маҳаллӣ,  хавфи «Давлати  исломӣ» барои  Марокаш ҳар  чи  бештар  мегардад. Террористон  кӯшиш  менамоянд, ки аъзои  нав,  аз ҷумла пайравони  динро  ба  сафҳои  худ ҷалб  кунанд. Назар  ба  гуфтаи  шайхи  маъруфи  салафиён  Умар  Ҳаддушӣ,  алҳол  беш  аз  ҳазор  нафар  фаъолони  «Давлати  исломӣ»  дар  Шоҳигарии  Марокаш  сукунат  доранд.