Ифтитоҳи парвандаи ҷиноятӣ бо иттиҳоми «хиёнат» нисбат ба Назарзода ва Умаров

Душанбе, 08.09.2015. (АМИТ «Ховар»). — Прокуратураи генералии Ҷумҳурии Тоҷикистон нисбат ба Абдуҳалим Назарзода ва Ҷунайдулло Умаров парвандаи ҷиноӣ боз кард. Нисбат ба ин ду нафар бо моддаҳои 305 – «хиёнат ба давлат», 307 (2) – «ташкили иттиҳоди экстремистӣ», 309 – «тахрибкорӣ» ва 179 – «терроризм»-и Кодекси ҷиноии Ҷумҳурии Тоҷикистон парванда боз шудааст. Ёдовар мешавем, ки 4-уми сентябри соли 2015, соати 04:28-дақиқа аз ҷониби гурӯҳи муташаккили ҷиноятӣ ба Шуъбаи корҳои дохилии шаҳри Ваҳдат, инчунин дастгоҳи марказии Вазорати мудофиаи Ҷумҳурии Тоҷикистон ҳуҷуми мусаллаҳона доир гардид. Дар натиҷа миқдори зиёди силоҳу муҳиммоти ҷангӣ аз ҷониби ин дастаи террористӣ тасарруф ва рабуда шуд. Дар натиҷаи гузаронидани амалиёти фаврӣ-ҷустуҷӯӣ аз ҷониби сохторҳои қудратии мамлакат муаяйн гардид, ки дастаи террористӣ аз тарафи генерал-майор Назарзода Абдуҳалим Мирзо (Ҳоҷӣ Ҳалим), муовини Вазири мудофиаи Ҷумҳурии Тоҷикистон, узви Ҳизби наҳзати исломии Тоҷикистон, собиқ размандаи Иттиҳоди нерӯҳои мухолифини Тоҷикистон, ки тибқи Созишномаи умумии истиқрори сулҳ ва ризоияти миллӣ дар Тоҷикистон аз 27-уми июни соли 1997 ба сафи Қувваҳои мусаллаҳи Ҷумҳурии Тоҷикистон ворид гардида буд, дар асоси нақшаи пешакӣ тарҳрезишуда ва маслиҳати қаблӣ бо ҳаммаслаконаш роҳандозӣ гардидааст.