«Кавкабони қутбнамои Панҷекат»-ҳикоятгари зиндагӣ ва фаъолияти занони Панҷакент

Душанбе, 19.09.2015. (АМИТ «Ховар»). — Китоби журналист Гулбаҳор Худойбердиева бо номи «Кавкабони қутбнамои Панҷекат» аз чоп баромад. 
Китоби мазкур хонандаро бо фаъолият ва зиндагии занони зодаи Панҷакенти бостонӣ шинос менамояд. 
Муаллифи китоб муътақид бар он аст, ки занони шаҳри Панҷакент бо корномаи меҳнатии худ мисли дигар занони ҷумҳурӣ обрӯю нуфузи хосса дошта, зикри корномаи онҳо ба шакли як китоб қатрае аз баҳр барои ҷоннисориҳои онҳо баҳри ободии Ватан-Модар мебошад. 
Гулбаҳор Худойбердиева мегӯяд, ки суханони Сарвари давлат Эмомалӣ Раҳмон дар васфи зан-модар ҳамеша илҳомбахши ӯ буда, дар таълифи ин китоб низ таъсири амиқ доранд. Аз ҷумла, Президенти кишвар таъкид медорад: «Мо бояд шукргузори замони осоишта бошем, ки дар ин давра Зан-Модар бори дигар дар ҷамъияти мо ба мақому манзалати воқеӣ молик гардид, ӯро ҳамчун ходими намоёни давлат, роҳбару роҳнамои мардум, муҳандиси номдор, табибу омӯзгори маъруф, коргари ҳунарманду деҳқони асил шинохтанд».
Китоби мазкур иқдоми нахустин дар ҷодаи зиндагӣ ва фаъолияти занони зодаи Панҷакент буда, армуғонест ба истиқболи ҷашни давлатии 25-солагии Истиқлолият ва 5500-солагии Панҷакенти бостонӣ.