«Корвони китоб» ба Хоруғ расид

Хоруғ, 16.09.2015 (АМИТ «Ховар», Файз Мирҳасан).-Дар майдончаи назди китобхонаи вилоятии ба номи А. Рӯдакӣ бо ширкати сокинон ва ҳунармандони бахши фарҳанги  шаҳри Хоруғ бо мақсади истиқбол аз гурӯҳи «Корвони китоб» маҳфили бошукӯҳ баргузор шуд. 
Директори  корхонаи давлатии  таъминот  ва савдои китоби Вазорати фарҳанги Ҷумҳурии Тоҷикистон  Сироҷиддин Икромӣ ин тадбирро барои боло бурдани сатҳи мутолиаи китоб байни наврасону ҷавонон ва таъмини китобхонаҳо бо китобҳои зарурӣ муҳим арзёбӣ намуда, баён дошт, ки дар зарфи нуҳ соли охир ба китобхонаҳои ҷумҳурӣ бештар аз 2 миллион сомонӣ китобҳои гуногун тақдим шуданд. Дар ин сафар мо ҳамроҳи худ ба маблағи 70 ҳазор сомонӣ китобҳо, рӯзномаву маҷаллаҳоро оварда, баъди ин маҳфил ба китобхонаҳои вилоят тақдим мекунем,-гуфт С. Икромӣ.