Машварати Шӯрои роҳбарони мақомоти назорати молиявии СҲИ дар Душанбе

Душанбе, 21.09.15. (АМИТ «Ховар»). — Имрӯз машварати ХХ Шӯрои   роҳбарони   мақомоти  олии  назорати  молиявии  давлатҳои  узви  Созмони  ҳамкории  иқтисодӣ  дар  шаҳри  Душанбе ба  кораш  шурӯъ мекунад. 
Тавре  ки  дар  ВКХ  ҶТ хабар  доданд, ҳайатҳои давлатҳои  узви  Созмони  ҳамкории  иқтисодӣ  барои  иштирок дар  машварат  ба  пойтахти  Тоҷикистон  омадаанд.
Созмони ҳамкории  иқтисодӣ —  ташкилоти  байнидавлатии  иқтисодии  минтақавӣ  ба шумор  рафта,  онро  соли  1985  кишварҳои Осиёи  Марказӣ  ва  Шарқи  Наздик  таъсис  дода буданд. Созмони  мазкур вориси  ҳуқуқии Созмони ҳамкории  минтақавӣ  барои  рушду  тақвият маҳсуб  ёфта,  дар  ҳошияи Низомномаи  Шартномаи Измир, ки  онро  12  марти  соли 1977 се  кишвари  муассис — Эрон,  Покистон ва  Туркия  таъсис  дода буданд, фаъолият  мекунад. 
То оғози  соли  1992 фаъолият дар  ҳошияи Созмони ҳамкории  иқтисодӣ  асосан хусусияти дуҷониба дошт. Созмони  мазкур  бинобар  ба он  ихтиёрона  шомил  шудани 7 давлати  нав аз  қабили  Тоҷикистон,  Қазоқистон,  Озарбойҷон,  Афғонистон,  Қирғизистон,  Туркманистон  ва  Ӯзбекистон  фаъолияташро  басо  рушду тақвият  бахшид. Соли  1995 дар  иҷлосияи  50 — уми  Маҷмаи Асосии  СММ Қатъномаи  ҳамкорӣ  бо  созмони  мазкур  қабул  шуда  ва аз он  вақт  аз  мақоми  нозир  дар  СММ бархӯрдор  аст. 
Ҷиҳатҳои  асосии  сиёсию  иқтисодии фаъолияти  Созмони  хамкории  иқтисодӣ  дар  ҳамоиши  сарони  давлатҳои  кишварҳои узви он, ки  дар  ҳар  ду  сол  як  маротиба  доир  мегардад,  муайян  карда  мешаванд.