Намояндагони доираҳои тиҷоратии Бошқирдистон ба Душанбе меоянд

 Душанбе, 25.09.2015.(АМИТ «Ховар», Марзия Саидзода).-Ҳайати доираҳои тиҷоратии Ҷумҳурии Бошқирдистон таҳти сарварии Павел Бармин-ноиби  президенти Палатаи савдо ва саноати ин кишвар 4 октябр ба Душанбе меояд. Ба ҳайати Бошқирдистон роҳбарону намояндагони ширкатҳои  «Южно-Уральский Весовой Завод», «Русь», «Азия-Инвест»,  «Сервис Монтаж Интеграция» ва «Шифер» шомиланд. Бино ба иттилои Мукаммал Раҷабӣ -сухангӯи Палатаи  савдо  ва саноати кишвар ҳайати доираҳои тиҷоратии Бошқирдистон бо раиси Палатаи савдо ва саноати Тоҷикистон Шариф Саид, соҳибкорону тоҷирони тоҷик, инчунин бо  роҳбарияти намояндагии тиҷоратии Русия дар Тоҷикистон мулоқот  менамояд. Ҳайати доираҳои тиҷоратии Бошқирдистон ҳамзамон зимни сафарашон ба Тоҷикистон аз Саридораи геологияи назди  Ҳукумати Ҷумҳурии Тоҷикистон,  ширкати ТАЛКО,  Агентии назорати маводии нашъаовари  назди Президенти кишвар, ширкату корхонаҳои «Тоҷкабел», «ТАДЭС», «Tradewary» ва «Институт Гидропрпоект» боздид менамоянд.
            Инчунин намояндагони тиҷоратии Бошқирдистон ба вилоятии Хатлон  сафар карда, бо роҳбарияти вилояти Хатлон ва соҳибкорону тоҷирони ин вилоят мулоқот  намуда, аз минтақаҳои озоди «Данғара» ва «Панҷ», инчунин аз марказҳои фарҳангии Тоҷикистон, назири Осорхонаи миллӣ,  «Кохи Наврӯз», Маркази исмоилиҳо, боғи «Ирам» ва дараи Варзоб боздид хоҳанд кард.