Тасмими Кумитаи забон ва истилоҳот ба ифтихори Рӯзи забони давлатӣ

                                                                                               «Умри миллат ба умри забон вобаста аст»
                                                                                                                                     (Эмомалӣ Раҳмон).
    
Душанбе, 18.09.2015.(АМИТ «Ховар», Марзия Саидзода).- Ба ифтихори Рӯзи забони давлатӣ, ки ҳамасола дар кишвар 5 октябр таҷлил мегардад, Кумитаи забон ва истилоҳоти назди Ҳукумати Ҷумҳурии Тоҷикистон тасмим гирифтааст, ки дар ҳамкорӣ бо вазорату идораҳои ҷумҳурӣ силсилаи чорабиниҳои илмию фарҳангиро баргузор намояд. Дар иртибот ба истиқболи сазовори ҷашни забони давлатӣ кумита  дар вазорату идораҳо, донишгоҳу донишкадаҳо, қисмҳои низомӣ,  ҷузъу томҳои  мақомоти қудратӣ ва мақомоти маҳаллии ҳокимияти давлатии шаҳру навоҳии кишвар маҷлисҳои тантанавӣ, конфронсҳои илмию амалӣ,  семинар, мизҳои мудаввар, маҳфилҳои адабӣ бо иштироки  олимону адибон ва забоншиносонро доир менамояд. Ҳамзамон ба ифтихори ин санаи фархунда  то 1 октябри соли равон хиёбону гулгаштҳо ва пештоқи  биноҳои маъмурии шаҳру навоҳии кишвар бо шиору овезаҳои  таблиғотӣ, ки бештари онҳо аз осори ниёкон ва аз суханрониҳои Президенти кишвар иқтибос оварда шудаанд,  оро дода мешаванд.
           Намуна:   «Забони миллӣ  симо ва пайкари миллати мост», «Забон моли халқ, мероси миллат ва сармояи маънавии давлати соҳибистиқлол аст», «Забони модарӣ хишти нахустини пойдевори кохи миллат аст», «Дар замони ҷаҳонишавӣ забони тоҷикӣ бояд пойдории таърихии худро  ҳифз карда тавонад», «Забон таърихи зиндагии миллат  ва пайвандагри наслҳои  дирӯзу имрӯз ва фардо мебошад», «Эҳтироми забони давлатӣ вазифаи ҳар як шаҳрванди  Ҷумҳурии Тоҷикистон аст». (Эмомалӣ Раҳмон).