Ёвон: таъмири асосии 1,8 км роҳи мошингард

Ёвон, 16.09.2015 (АМИТ «Ховар», Субҳониддини Маҳмуд).-Муассисаи давлатии нигоҳдории роҳҳои мошингарди ноҳияи Ёвон 224,6 км роҳҳои мошингардро нигоҳдорӣ ва таъмир менамояд, ки аз ин 70,8 км роҳ аҳамияти ҷумҳуриявӣ дошта, 70,8 км роҳҳои асфалту бетонӣ ва 153,8 км роҳҳо дорои аҳамияти маҳалӣ  мебошанд.
 Барои таъмиру нигоҳдории роҳҳои мошингард ба муассисаи мазкур дар ин муддат аз буҷаи маҳаллӣ 330 ҳазор ва аз буҷаи ҷумҳуриявӣ 163 ҳазор сомонӣ пардохт гардида, бо истифода аз ин маблағ 910 тонна омехтаи мумқир тайёр ва  150 тонна асфалт харид шудааст.  
Дар 52 км роҳи дорои аҳамияти ҷумҳуриявӣ корҳои таъмири ҷорӣ ва дар 1,8 км таъмири асосӣ гузаронида шуданд. Инчунин дар ин давра дар ҳаҷми 1560 метри квадратӣ корҳои тоза намудани қубурҳои об ва селпарто гузаронида шуда, 37 аломати роҳ аз нав таъмир ва иваз карда шуд.