Зоирин дар хонаи Худо барои осоишу суботи Тоҷикистон дуо мекунанд

Душанбе, 14.09.2015. (АМИТ «Ховар»). — Тавре ки аз шаҳри Маккаи Мамлакати Арабистони Саудӣ ба АМИТ «Ховар» иттилоъ доданд, имрӯзҳо зоирони Тоҷикистон пас аз адои маносики умра намозҳои худро дар Масҷиди Ҳаром ба ҷо меоранд ва хонаи Худоро тавоф менамоянд. Гурӯҳи корӣ, роҳбаладон бо роҳбарии Азизулло Мирзозода, сардори ситоди ҳаҷи Ҷумҳурии Тоҷикистон ба мавқеи Мино рафта, бо роҳи рафту омад, бо шароити хаймаҳо ва таъйину тақсимоти макони сукунати зоирон ошно шуданд. Зоирони Тоҷикистон аз номи волидон ва ақрабои хеш умраро адо намуда, савобашро ба онҳо мебахшанд ва ҷойҳои таърихиро тамошо мекунанд. Домулло Абдураҳими Понғозӣ иброз дошт, ки ӯ дар Ҳарам ва ҷойҳои иҷобати дуо ҳамеша амният ва сулҳу осоиштагии Тоҷикистонро аз даргоҳи Худованд таманно менамояд. 
Мавсуф аз воқеаҳои охире, ки дар Тоҷикистон рӯй доданд, ёдовар шуда, гуфт, ки ҳар як сокини Тоҷикистон вазифадор аст амнияти кишварро чун гавҳараки чашм ҳифз намояд ва нагузорадба он халале афтад.  
Мискин Намакинов, зоири хонаи Худо аз ноҳияи Рӯшон, ки бо квотаи Президенти мамлакат ба зиёрат рафтааст, зикр кард, ки аз саховатмандии Сарвари давлат хеле миннатдор аст: “Аз Худо талаб мекунам, ки Тоҷикистони моро ҳамеша дар амну осоиштагӣ нигоҳ дорад”, -гуфт М.Намакинов.
Тавре ки аз  маркази матбуоти  «Ҳаҷ-2015» иттилоъ доданд, 14 табиби пуртаҷрибаи тоҷик бо роҳбарии Раҷабалӣ Холиқов ва Алламурод Кавраков дар се нуқтаи тиббии меҳмонхонаҳо зоиринро таҳти назорати тиббӣ гирифтаанд. Саломатии ҳамаи ҳоҷиён хуб буда, нуқтаҳои тиббӣ бо тамоми маводи доруворӣ таъминанд ва духтурон ба таври шабонарӯзӣ навбатдорӣ мекунанд — гуфт Р.Холиқов.