Ҳайати Ӯзбекистон дар ҷаласаи ШСҲ ИДМ иштирок мекунад

Душанбе, 29.10.15. (АМИТ «Ховар»). — 30  октябр  ҳайати  Ӯзбекистон  дар  кори  ҷаласаи  навбатии  Шӯрои  сарони ҳукуматҳои  Иттиҳоди  Давлатҳои  Мустақил  дар  шаҳри  Душанбе  иштирок  менамояд. Мувофиқи  маълумоти  ВКХ  Ӯзбекистон, роҳбарии ҳайати  Ӯзбекистонро  ноиби  сарвазири  ҳукумат Адҳам  Икромов  ба  ӯҳда  дорад.
Иштирокдорони  ҷаласа  беш  аз  30  масъала, аз ҷумла  қабули  нақшаи   татбиқи  марҳалаи  сеюми Стратегияи   рушди  иқтисодии  ИДМ   барои  давраи  то  соли  2020,  ворид  намудани тағйирот  ба  баъзе  шартномаю  қарорҳои байналмилалии қаблан  қабулкардаи  ИДМ,  ҳамчунин  ҷараёни   татбиқи   нуктаҳои  Шартнома   дар  бораи  минтақаи тиҷорати озод  аз 18  октябри  соли  2011 — ро  мавриди муҳокима  қарор  медиҳанд. Онҳо  бояд   нақшаи   чорабиниҳо   бахшида  ба  таҷлили  25 — солагии  таъсиси  ИДМ  дар  соли  2016 — ро тасдиқ  намоянд.
Ёдовар  мешавем, ки  дар нимаи  дуюми  имрӯз  роҳбарони  ҳайатҳо  ва иштирокдорони  ҷаласаи  Шӯрои  сарони ҳукуматҳои  ИДМ  ба  пойтахти  Тоҷикистон  меоянд.