Ҳавопаймоҳои амрикоӣ 50 тонна аслиҳа ва муҳимоти ҷангӣ барои мухолифони давлати Сурия ирсол кардаанд

Душанбе, 13.10.2015 (АМИТ «Ховар»).- Бино бар гузориши шабакаи телевизионии «Алҷадид»-и Лубнон, сухангўи Вазорати дифои Амрико эълом кард, ки  ҳавопаймоҳои Си 17-и артиши Амрико бо ҳимояти ҷетҳои ин кишвар бастаи шомили силоҳу муҳимот ва бомбаҳои дастиро шаби якшанбе дар минтақаҳои мухталифи вилояти Ҳасака дар шимоли Сурия ирсол кардаанд. Бино бар ин гузориш ин маҳмулаҳои аслиҳа дар манотиқи таҳти ихтиёри гурўҳҳои мухолифи давлати Башор Асад фуруд омадаанд. Дар ҳамин робита Абумаоз, сухангўи гурўҳи мавсуф ба фидоиёни «Раққа» пеш аз ин аз мувофиқати Вашингтон барои ирсоли силоҳ ба гурӯҳҳои мусаллаҳ  дар вилояти Раққа хабар дода буданд.
Ин дар ҳолест, ки мақомҳои Вазорати дифоъи амрикоӣ моҳи гузашта тасдиқ карданд, ки пайкорҷўёни омўзишдида тавассути ин кишвар, ки барои ҷангидан бо террористҳои ДИИШ ба Сурия равон шуда буданд, қисме аз силоҳҳо ва таҷҳизоти худро ба гурўҳи «Ҷабҳатун Нусра» додаанд.
Толибон барои мубориза бо ДИИШ омодагӣ мегиранд
Душанбе, 13.10.2015 (АМИТ «Ховар»).- Гурўҳи мухолифи давлати Афғонистон Толибон барои мубориза бо ДИИШ дар ин давлат қувваҳои  махсус  ташкил додаанд. Чунин қувваҳо дар вилоятҳои Кунар ва Нуристон низ таъсис ёфтаанд. Тибқи нақли Би Би Си намояндаҳои Толибон  ин хабарро тасдиқ намуда, онро ҳимоят аз ҳамлаҳои ДИИШ ба онҳо таъбир менамоянд.
Тибқи нақли манбаъҳо, Толибон бо ин роҳ мехоҳанд пас аз ҷиноятҳои зиёди содиркардаи худ, ки дар байни аҳолӣ нуфузи худро аз даст додаанд, то ҷое онро барқарор намоянд.