Азим Иброҳим: «Талаботи асосӣ дар нақби «Истиқлол» пешгирии обҳои зеризаминӣ мебошад»

Душанбе, 20.10.2015. (АМИТ «Ховар»). — 17 октябри соли ҷорӣ муовини Сарвазир Азим Иброҳим вобаста ба баҳодиҳии сифати корҳои сементкунонии фарш ва пешгирии ҷоришавии об дар дохили нақб, ки аз ҷониби зерсохторҳои Вазорати нақлиёти Ҷумҳурии Тоҷикистон ва ширкати «Собир»-и Ҷумҳурии Исломии Эрон анҷом дода шуданд, аз нақби «Истиқлол» дидан намуд. 
Баъд аз муоинаи корҳои анҷомёфта ва суҳбати тахассусӣ бо масъулини Вазорати нақлиёт ва ширкати «Собир» муовини Сарвазир зикр  намуд, ки  дар маҷмӯъ корҳои сохтмону барқарорсозӣ хуб анҷом ёфтаанд, вале баҳогузории сифати корҳои анҷомдода танҳо моҳҳои июн -июли соли 2016, яъне баъди обшавии яхҳо  имкон дорад. 
Инчунин ба масъулини соҳа дастур дода шуд, ки ба ҷараёни иҷрои корҳои марҳилаи дуюми дохили нақб, ки аз равшангардонӣ ва насб намудани ҳавокашҳои пуриқтидор  иборат мебошад, вусъат  бахшида шавад.