БМТ: Даври якуми озмун барои ишғоли ҷойҳои корӣ баргузор гардид

Душанбе, 28.10. 2015. (АМИТ «Ховар»). — Бо мақсади баланд бардоштани сатҳи дониш ва малакаи касбии кормандон, таъмини батадриҷи самаранокии фаъолияти бонк дар чаҳорчӯба ва идомаи ислоҳоти сохторӣ 27 октябри соли равон дар Бонки миллии Тоҷикистон даври якуми озмун барои ишғоли ҷойҳои корӣ баргузор гардид.
Барои иштирок дар озмун ҳамаи довталабон — зиёда аз 400 нафар, ки дар муҳлати муайяншуда ба Идораи кормандони Бонки миллии Тоҷикистон ҳуҷҷат супорида буданд, ширкат варзиданд. Даври  якуми озмун ба таври хаттӣ (санҷиши тестӣ) гузаронида шуд. Дар даври аввали озмун барои дар маҷмӯъ муайян кардани сатҳи дониши назариявии довталабон саволҳои санҷиши тестӣ аз мисолу масъалаҳо тартиб дода шуданд.  
Даври дуюми озмун аз тариқи суҳбат баргузор гардида, довталабоне, ки аз даври якум бомуваффақият гузаштаанд, ба он роҳ дода мешаванд.
Довталабоне, ки дар ҷараёни супоридани санҷиши тестӣ ва суҳбатҳои минбаъдаи озмун дониши баланд, малакаи хуби касбӣ ва идоракунӣ нишон медиҳанду соҳиби таҷрибаи зиёд ва бенуқсони корӣ мебошанд, бо пешниҳоди Комиссияи озмун ва дастгирии роҳбарият ба вазифаҳои баландтар ва  масъулиятнок таъйин мешаванд.