Боздиди сафири Тоҷикистон аз бародаршаҳри Душанбе-Клагенфурт

Душанбе, 17.10.2015 (АМИТ “Ховар”).- 14 октябри соли 2015 Сафири Ҷумҳурии Тоҷикистон дар Австрия Исматулло Насрединов ба маркази маъмурии замини федералии Каринтия-шаҳри Клагенфурт сафари корӣ анҷом дод.   
Дар доираи ин боздид Сафири кишвар нахуст бо Президенти органи қонунбарор “Ландтаг”-и замини федералии Карития Райнҳард Роҳр вохӯрӣ доир намуд, ки дар ҷараёни он имкониятҳои ба роҳ мондани ҳамкории мутақобила бо Маҷлиси вакилони халқи шаҳри Душанбе ва Ландтаги замини федералии Каринтия мавриди баррасӣ қарор гирифт.
Сипас дипломати тоҷикистонӣ аз ҷониби Бургомистри Клагенфурт хонум Мариа Луизе Матиашитс ба ҳузур пазируфта шуд. Дар ин мулоқот тарафҳо атрофи масъалаҳои ҳамкорӣ миёни бародаршаҳрҳо — Душанбе ва Клагенфурт, аз ҷумла дар бахшҳои иқтисод, фарҳанг, сайёҳӣ, ташкили сафарҳои мутақобила ва дигар мавзуъҳои мубрам табодули назар карданд. 
Дар фарҷоми гуфтугӯ Сафири Тоҷикистон ба китоби ёддоштҳои меҳмонони фахрӣ таассурот ва таманниёти худро сабт намуд. 
Робитаҳои бародаршаҳрӣ миёни Душанбе ва Клагенфурт соли 1972 барқарор шуда, 4 октябри соли 1988 аз ҷониби Тоҷикистон ба бародаршаҳр Чойхона бо ороиши санъати миллӣ дар шакли айвон сохта, тақдим шудааст. Дар баробари ин яке аз кӯчаҳои шаҳри Клагенфурт ба номи Душанбе (Duschanbegasse) ва яке аз кӯчаҳои пойтахти мо ба номи Клагенфурт гузошта шудааст.