Бунёди зиёда аз 500 корхонаву коргоҳҳои саноатӣ бо зиёда аз 13 ҳазор ҷойҳои нави корӣ дар Суғд

Душанбе, 21.10.2015. (АМИТ “Ховар”). – “Тайи даҳ соли охир дар қаламрави вилояти Суғд зиёда аз 500 корхонаву коргоҳҳои саноатӣ бо зиёда аз 13 ҳазор ҷойҳои нави корӣ ба истифода дода шудаанд, ки ҳоло онҳо ба зиёдшавии ҳаҷм ва номгўи маҳсулоти истеҳсолшаванда мусоидат карда истодаанд”, — иброз дошт Сарвари давлат зимни суханронӣ дар мулоқот бо роҳбарону фаъолони Суғд 21  октябр. 
Мувофиқи маълумот соли гузашта дар вилоят ба маблағи 3,8 миллиард сомонӣ маҳсулоти саноатӣ истеҳсол карда шудааст, ки дар муқоиса бо соли 2005 беш аз ду баробар зиёд мебошад.
Ба ҳолати аввали сентябри соли равон ҳаҷми истеҳсоли маҳсулоти саноатӣ дар вилоят ба 2,8 миллиард сомонӣ расидааст, ки нисбат ба ҳамин давраи соли гузашта 574 миллион сомонӣ зиёд мебошад.
Инчунин дар ин раванд бо бунёд кардани даҳҳо корхонаву коргоҳҳои коркарди гандум воридоти орд торафт коҳиш ёфта, ҳаҷми истеҳсоли он дар дохили кишвар зиёд карда шуд.