Дар вилояти Нангарҳор 100 силоҳбадасти «Давлати исломӣ» кушта шуд

Душанбе, 02.10.15. (АМИТ «Ховар»). — Назар  ба  иттилои ҳокимиятҳои  маҳаллӣ,  дар  ҷараёни  бархӯрдҳои  мусаллаҳона  дар  ҳудуди  вилояти Нангарҳори  Афғонистон камаш 100  нафар  силоҳбадастони  гурӯҳи  «Давлати  исломӣ»  кушта  шуданд.
Ёдовар  мешавем, ки   шаби рӯзи  сешанбеи  гузашта  силоҳбадастон  ба  бунгоҳҳои  назорати  вулусволии Ачин ҳамла оварданд. Назар  ба  иттилои шабакаи телевизионии «Тулӯъ», алҳол ҳамлаи силоҳбадастон  зада гардонида шуда, вале  амалиёти  ҳарбӣ  дар маҳалҳои  алоҳидаи  вулусволӣ  идома дорад. 
 Мувофиқи маълумоти  охирини  роҳбарияти  пулис, то имрӯз  аз ҷониби  қувваҳои  Афғонистон  3  нафар ҳалок  ва  8  нафар  захмӣ  шудааст.  Маълумот  дар  бораи ба  ҳалокат  расидан  ва  захмӣ  шудани  сокинони  осоишта то  ҳол ба  матбуот  нарасидааст.