Даъвати донишҷӯён ба ватандӯстӣ

Душанбе, 07.10.2015. (АМИТ «Ховар»).-6 октябри соли 2015 тибқи нақшаи таҳияи чорабиниҳои «Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020» ва бо мақсади иҷрои Нақшаи чорабиниҳои вобаста ба татбиқи иҷрои “Барномаи таълимӣ ва тарбияи ҳуқуқии шаҳрвандони Ҷумҳурии Тоҷикистон барои солҳои 2009-2019” дар Донишгоҳи миллии Тоҷикистон вохӯрӣ бо донишҷӯёни факултаҳои ҳуқуқшиносӣ, робитаҳои байналмилалӣ ва таърих баргузор гардид, ки дар он намояндагони Агентии назорати маводи нашъаовари назди Президенти ҶТ, Вазорати корҳои дохилӣ, Кумитаи кор бо занон ва оила, Кумитаи ҷавонон, варзиш ва сайёҳии назди Ҳукумати ҶТ иштирок намуданд.  
Муовини директори агентӣ М. Ҳайдарзода оид ба ҷанбаҳои тарбияи ҷавонон, натиҷаҳои таҳияи “Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020”, масъалаҳои ҷалби ҷавонон ба гурӯҳҳои террористӣ ва экстремистӣ, пешгирии содиршавии ҷиноятҳо, қонунвайронкунии маъмурӣ ва пешгирии нашъамандӣ сухан гуфт.