Экстремизм бо амалҳои зиддиҳуқуқӣ зоҳир мешавад

Душанбе, 28.10.2015. (АМИТ «Ховар»).-Дар факултаи геоэкологии Донишгоҳи давлатии Хуҷанд ба номи академик Бобоҷон Ғафуров чорабинии тарбиявӣ дар мавзӯи «Пешгирии шомилшавии ҷавонони гумроҳ ба ҳизбу ҳаракатҳои ғайриқонунӣ» бо иштироки сардори Хадамоти пешгирии  ҳуқуқвайронкунӣ байни ноболиғон ва ҷавонони РВКД Ҷумҳурии Тоҷикистон дар вилояти Суғд  Назирҷон Турсунов ва Ф. Нарзиев, муовини ин хадамот баргузор гардид. 
Тавре ки аз ДДХ хабар доданд, Дадахон Ғуфронов -муовини декан оид ба корҳои тарбияи факултаи геоэкология зикр кард, ки солҳои охир дар Тоҷикистон чун дар дигар мамлакатҳо экстремизм ва ҷиноятҳои хусусияти экстремистӣ дошта зоҳир шуда истодаанд. Онҳо дар шаклҳои гуногун дар сиёсат, иқтисодиёт, муносибатҳои байнимиллӣ ва динӣ, тарзҳои гуногуни ҳимояи манфиат, ҳуқуқ, афкор ва ҳамчунин усулҳои содир кардани як зумра ҷиноятҳои бо экстремизм ҳамқадам зоҳир мешаванд. Экстремизм маънии побастагӣ ба афкор ва чораҳои ғайриқонунӣ дошта, майли инсонро ба роҳи ҳалли масъалаҳои иҷтимоӣ, сиёсӣ, ҳуқуқӣ, иқтисодӣ, экологӣ ва миллӣ бо восита ва усулҳои дар ҷамъият қабулнашударо нишон медиҳад. Баробари ин вай ҷараёни калонро дар доираи ҷараёнҳои муосири идеологӣ ва ҳаракатҳои ҷамъиятӣ- сиёсӣ нишон медиҳад, ки онҳо кӯшиш доранд, ба раванди тараққиёти ҷамъиятӣ халал расонанд. Асосноккунии назариявии экстремизм онро нишон медиҳад, ки ҷамъияти имрӯза қобилияти ба таври конструктивӣ ва бидуни зӯроварӣ ҳал кардани масъалаҳои ҷамъиятӣ- сиёсиро гум кардааст. Аз ин лиҳоз, мо барои пешгирии корҳои номатлуб чорабинии тарбиявиро барои донишҷӯён  ташкил  намудем. 
Назирҷон Турсунов, сардори Хадамоти пешгирии  ҳуқуқвайронкунӣ байни ноболиғон ва ҷавонони РВКД Ҷумҳурии Тоҷикистон дар вилояти Суғд зикр намуд, ки табиати назарияи экстремистӣ дар инкишофи мантиқии афкор ифода меёбад. Қисми зиёди чунин назарияҳо бо як хулосаҳои бемаънӣ мутлақ шуда мондаанд. Ҷараёнҳои экстремистӣ бо ҳокимият алоқамандӣ надошта, ба истибдод кӯшиш мекунанд. Ҳамаи намудҳои экстремизм назарияи сӯиқасдро истифода мебарад.
Б.Ҳаитбоев, донишҷӯи курси 4-уми ихтисоси география — демография дар мавзӯи «Экстремизм ва терроризм-хатари ҷомеа» гуфт, ки экстремизм- ин шакли инкори радикалии меъёрҳо ва қоидаҳои ҷамъиятии дар давлат мавҷудбуда аз тарафи шахсони алоҳида ё гурӯҳҳо мебошад. Сабаби он дар сатҳи пасти маълумоти мардум, ҳолати бӯҳронии ҷамъият ва низоми ҳуқуқии каммаҳсул мебошад. Баъзе намудҳои экстремизм решаҳои таърихӣ дорад. Экстремизм масъалаи тезутунди муосир аст. Вай бештар дар ҳаёти сиёсӣ, иқтисодӣ, иҷтимоӣ, динӣ ва дигар соҳаҳо зоҳир мешавад. Болоравии экстремизм ба асосҳои сохтори конститутсионӣ ва бехатарии давлат таҳдиди ҷиддӣ мерасонад. Аз он ҷиҳат, ки экстремизм бо амалҳои зиддиҳуқуқӣ зоҳир мешавад, вай барои шахс хатарнок буда, ҳуқуқ ва озодиҳои инсонро вайрон мекунад, ҳаёти ҷамъиятро номӯътадил мегардонад. Зоҳиршавии он аз зарари психологӣ ва моддӣ ба давлат ва ҷамъият то маҳрум кардан аз ҳаёти фардҳои алоҳида маънидод мегардад. Оқибатҳои зуҳуроти ҷиноии экстремизм баъди содир кардани амалҳои муайян маълум мешаванд.