Вобаста ба нақши Пешвои миллат дар рушди илму маориф ҳамоиш баргузор гардид

ДУШАНБЕ, 18.11.2025 /АМИТ «Ховар»/. Дар Муассисаи давлатии таълимии Литсей барои хонандагони болаёқат дар шаҳри Душанбе бахшида ба Рӯзи Президенти Ҷумҳурии Тоҷикистон таҳти унвони «Эмомалӣ Раҳмон – ҳомии истиқлолияти давлатӣ ва меъмори сулҳу ваҳдати миллӣ» ҳамоиши идона баргузор гардид. Дар ин хусус ба АМИТ «Ховар» аз Литсей барои хонандагони болаёқат дар шаҳри Душанбе хабар доданд.

Қабл аз оғози ҳамоиш дастовардҳои илмии муҳассилини литсей дар озмуну олимпиадаҳои фаннии дохилию ҷаҳонӣ, корҳои лабораторӣ ва имконияти муассиса ба намоиш гузошта шуд.

Иброз гардид, ки Рӯзи Президент рамзи арҷгузорӣ ба нақши Пешвои миллат дар таҳкими давлатдорӣ, ваҳдати миллӣ ва пешрафти мамлакат мебошад. Ин сана эҳтиром ба заҳматҳои Роҳбари давлат аст, ки барои сулҳу субот ва ободии Тоҷикистон талошҳои бузург намудаанд.

Зимни ҳамоиш ходими адабӣ Ғайбулло Авзалов изҳор дошт, ки рӯйдоди бузургтарини Иҷлосияи XVI Шурои Олӣ- интихоби Эмомалӣ Раҳмон ба вазифаи Раиси Шурои Олӣ ва сипас соли 1994 ба маснади Президенти Ҷумҳурии Тоҷикистон буд, ки роҳи рушди минбаъдаи мамлакатро равшан ва устувор сохт.

Иштирокдорон изҳор доштанд, ки Пешвои миллат муҳтарам Эмомалӣ Раҳмон рушди маорифро яке аз самтҳои афзалиятноки сиёсати давлатӣ арзёбӣ намуда, дар давраи истиқлол барои тақвияти низоми таълимӣ ва баланд бардоштани сифати таҳсил иқдоми созанда ба роҳ монданд.

АКС: Муассисаи давлатии таълимии Литсей барои хонандагони болаёқат дар шаҳри Душанбе